کرکٹ کی سرگرمیاں شروع نہ کی گئیں تو تمام بورڈز دیوالیہ ہو جائیں گے،عاقب جاوید
اعتماد نیوز
لاہور: سابق ٹیسٹ کرکٹر عاقب جاوید نے خبردار کیا ہے کہ اگر کرکٹ کی سرگرمیاں شروع نہ کی گئیں تو تمام کرکٹ بورڈز دیوالیہ ہو جائیں گے۔
ایک انٹرویومیں سابق ٹیسٹ کرکٹر عاقب جاوید نے کہا کہ دنیا کے تمام کرکٹ بورڈز کو بھی اب تیزی سے یہ سوچنا ہو گا کہ کب سے سرگرمیاں شروع کی جائیں، کورونا وائرس کے خاتمے میں سال یا اس سے بھی زیادہ لگ سکتا ہے اور اگر سرگرمیاں شروع نہ کی گئیں تو شاید پھر بورڈز بھی نہ رہیں اور کرکٹ بھی نہ رہے۔
عاقب جاوید نے خبردار کیا کہ اگر چند ماہ میں مزید کرکٹ نہ ہوئی تو تمام کرکٹ بورڈز دیوالیہ ہو جائیں گے۔عاقب جاوید نے کہا کہ حفاظتی اقدامات کرکے کرکٹ کی سرگرمیاں آسانی سے شروع ہو سکتی ہیں، اگر اس وقت پاکستان انگلینڈ سیریز کے حوالے سے سے بات کروں تو میں یہ تجویز کروں گا کہ کھلاڑیوں اور آفیشلز کے ٹیسٹ کرائیں اور انہیں ایک جگہ رکھیں۔
انہوں نے کہا ہے کہ پاکستان کے کھلاڑیوں اور آفیشلز کو نیشنل کرکٹ اکیڈمی میں ایک فیملی کی طرح رکھا جا سکتا ہے اور وہاں انہیں کسی سے ملنے نہ دیا جائے۔
عاقب جاوید نے کہا کہ انگلینڈ یا کسی بھی دوسرے ملک روانگی سے قبل ایک مرتبہ پھر ٹیسٹ کرایا جائے اور پھر انگلینڈ پہنچ کر بھی قرنطینہ میں رہیں اور ٹیسٹ کے بعد کھیل کی سرگرمیاں شروع کریں، اسی طرح گراونڈ اسٹاف اور دیگر متعلقہ لوگوں کے ٹیسٹ لیے جائیں۔سابق کرکٹر نے کہا کہ لوگ اس وقت بند دروازوں میں کھیلوں کے مقابلوں کی باتیں کر رہے ہیں، اس حوالے سے یہ کہوں گا کہ 30 ہزار تماشائیوں والے اسٹیڈیم میں 5 ہزار تماشائیوں کو آنے کی اجازت دی جائے، تماشائیوں کے لیے کورونا ٹیسٹ لازمی ہو اور بخار چیک کرکے انہیں اسٹیڈیم کے اندر داخلے کی اجازت دی جائے۔انہوں نے کہا کہ بند دروازوں کی بجائے حفاظتی اقدامات میں فینز کے ساتھ کرکٹ کی واپسی ممکن بنائی جائے۔
