Saturday , October 31 2020

ضلعی سطح پر ٹیلنٹ ہنٹ اورکھیلوں میں مقابلہ سازی کے لئے تنظیمی ڈھا نچے کی از سر نو تشکیل سازی کی ضرورت ہے ، عمران خان

اعتماد نیوز

اسلام آباد: وزیراعظم عمران خان نے کہا ہے کہ پاکستان میں کھیلوں کا بے پناہ پوٹینشل ہے، ماضی میں ہمارے کھلاڑیوں نے کرکٹ، ہاکی، اسکواش اور دیگر روایتی کھیلوں میں سالہا سال ملک کا نام روشن کیا،بد قسمتی سے سفارشی کلچر، کرپشن، میرٹ کی حوصلہ شکنی اور نا اہلی کی وجہ سے کھیلوں میں کارکردگی بتدریج غیر معیاری ہوتی چلی گئی، ضلعی سطح پر ٹیلنٹ ہنٹ اور مقابلہ سازی کے لئے تنظیمی ڈھا نچے کی از سر نو تشکیل سازی کی ضرورت ہے ،قومی اور روایتی کھیلوں میں نمایاں کار کردگی دکھانے اور ملک کا نام روشن کرنے والے کھلاڑیوں کی حوصلہ افزائی ہونی چاہئے اور ان کو کھیلوں کے مزید فروغ کے لئے آئیڈیل پلیٹ فارم میسر ہوناچاہئے۔

جمعہ کو وزیراعظم عمران خان کی زیر صدارت ملک میں کھیلوں کے فروغ کے لئے اقدامات کے حوالے سے جائزہ اجلاس ہوا جس میں وزیر برائے بین الصوبائی رابطہ ڈاکٹرفہمیدہ مرزا اور سینیئر افسران اجلاس میں شریک تھے۔وزیر برائے بین الصوبائی رابطہ ڈاکٹر فہمیدہ مرزا نے وزیراعظم کو پاکستان سپورٹس بورڈ میں وزیراعظم کے ملک میں کھیلوں کے فروغ، میرٹ اور شفافیت کو یقینی بنانے کے ویڑن کی روشنی میں ازسر نو تنظیم سازی کے لئے اٹھائے جانے والے اقدامات پر آگاہ کرتے ہوئے کہا کہ پاکستان سپورٹس بورڈ کی ایگزیکٹو کمیٹی کی تشکیل نو کر دی گئی ہے اور پیشہ وارانہ مینیجمینٹ کنسلٹنٹس کی سفارشات کی روشنی میں نیا تنظیمی ڈھانچہ مرتب کیا جا رہا ہے۔

وزیر برائے بین الصوبائی رابطہ نے سپورٹس کمپلیکس اسلام آباد اور صوبائی دارالحکومتوں میں کوچنگ سینٹرز میں کھیلوں کے انفراسٹرکچر اور دیگر سہولیات کی بحالی، ادارے کا اسپیشل آڈٹ اور انتظامی امور میں گزشتہ دو سال میں نمایاں بہتری کے حوالے سے اقدامات کا ذکر کرتے ہوئے کہا کہ غیر ضروری اخراجات میں نمایاں کمی، سفارشی کلچر کا خاتمہ، میرٹ اور شفافیت کو یقینی بنایا گیا ہے۔ ان اقدامات کے نتیجے میں پاکستان سپورٹس بورڈ کے منافع میں اضافہ ہوا ہے اور مستحق کھلاڑیوں کو گرانٹس کی مد میں مالی معاونت فراہم کی گئی ہے جس میں COVID-19 کے دوران مالی معاونت بھی شامل ہے۔ قومی اور بین الاقوامی سطح پر کھیلوں کے فروغ کے لئے وفاقی سپورٹس کوارڈینیشن کمیٹی کی تشکیل، ای آفس کے اقدامات، سپورٹس کمپلیکس میں قومی اور بین الاقوامی ایونٹس کا انعقاد ، نئے تعمیری منصوبوں میں کھیلوں کے مراکز کے قیام کو یقینی بنانے، روایتی اور علاقائی کھیلوں کے فروغ، پرائم منسٹرز سپورٹس پورٹل، میرا کپتان سپورٹس پورٹل اور چودھویں ساوتھ ایشین گیمز کے 2021 میں ملک میں انعقاد کے حوالے سے اقدامات اور تیاریوں پر بھی شرکائ کو تفصیلی بریفنگ دی گئی۔

وزیراعظم عمران خان نے اجلاس سے خطاب کرتے ہوئے کہا کہ پاکستان میں کھیلوں کا بے پناہ پوٹینشل ہے۔ ماضی میں ہمارے کھلاڑیوں نے کرکٹ، ہاکی، اسکواش اور دیگر روایتی کھیلوں میں سالہا سال ملک کا نام روشن کیا۔ بد قسمتی سے سفارشی کلچر، کرپشن، میرٹ کی حوصلہ شکنی اور نا اہلی کی وجہ سے کھیلوں میں کارکردگی بتدریج غیر معیاری ہوتی چلی گئی۔وزیراعظم نے ضلعی سطح پر ٹیلنٹ ہنٹ اور مقابلہ سازی کے لئے تنظیمی ڈھا نچے کی از سر نو تشکیل سازی کی ضرورت پر زور دیتے ہوئے کہا کہ ازسر نو تشکیل سازی سے پاکستان میں کھیلوں کی بحالی کا آغاز ہوگا۔ ماضی کا کھیلوں کا تنظیمی ڈھانچہ نہ صرف غیر فعال ہو چکا ہے بلکہ اس غیر فعال ڈھانچے کی وجہ سے قومی ٹیلنٹ کی بھی حوصلہ شکنی ہو رہی ہے۔

وزیر اعظم نے کہا کہ قومی اور روایتی کھیلوں میں نمایاں کار کردگی دکھانے اور ملک کا نام روشن کرنے والے کھلاڑیوں کی حوصلہ افزائی ہونی چاہئے اور ان کو کھیلوں کے مزید فروغ کے لئے آئیڈیل پلیٹ فارم میسر ہوناچاہئے۔وزیراعظم نے ملک میں کھیلوں کے فروغ کے حوالے سے وفاقی اور صوبائی سطح پر سپورٹس بورڈذ کی تمام اسٹیک ہولڈرز کی مشاورت سے از سر نو موثر تشکیل، اور پاکستان کانیا سپورٹس میپ مرتب کرنے کی ہدایت۔


About

Leave Comment

Skip to toolbar